Бақтияр Артаев бокс федерациясын басқаруға лайық па?
Спорт саласына қатысты петиция құрылды
Қазақстанда спорт саласына реформа жүргізу және олигархтар мен бұрынғы шенеуніктерді спорт басшылығынан аластату талаптарымен петиция құрылды, деп Dopmedia.kz тілшісі Meta-ratings.kz сайтына сілтеме жасап хабарлайды.
Азаматтар спорт саласындағы қазіргі мәселелерге алаңдаушылық білдіріп, жағдайды жақсартуға бағытталған нақты өзгерістерді ұсынады. Петициядағы басты талаптардың қатарында спорттық ұйымдардың басшылығынан олигархтар мен бұрынғы шенеуніктерді шеттету, мемлекет пен спорт федерациялары арасындағы өзара әрекеттестікті қайта қарау және бюджет қаражатын пайдаланудағы ашықтықты арттыру бар.
Петицияда көрсетілген негізгі мәселелер:
1. Халықаралық жарыстардағы қанағаттанарлықсыз нәтижелер.
2. Спорт федерацияларын басқарудағы ашықтықтың жоқтығы.
3. Спортқа бөлінген бюджет қаражатының тиімсіз пайдаланылуы.
Петицияны қолдаушылар осы мәселелерге назар аударылып, Қазақстанның спорт саласында көптен күткен реформалар басталады деп үміттенеді. Петиция авторы – мәжіліс депутаттығына экс-кандидат Дінмұхамед Қаматай.
Еске сала кетейік, Қаматай бұған дейін АҚШ-тың Ұлттық студенттік спорт қауымдастығының жүйесін енгізуді ұсынған болатын, бұл көптеген жас спортшылар үшін АҚШ-тағы табысты мансапқа жол ашатын жүйе ретінде қарастырылады.