"15 мың теңгелік пәтерде жүрмін": Арбатта ән салған келіншек бар сырын ақтарды

Әлеуметтік желіде қолында кішкентай баласымен Алматының Арбатында ән айтқан әйелдің видеосы тарап жатыр. Massaget.kz видео кейіпкерін тапты, деп хабарлайды Dopmedia.kz.

Арбатта ән айтқан балалы әйелдің видеосы TikTok желісінде 1 миллион 600 мың қаралым жинаған.

Желі қолданушылары әйелге көмектескісі келетінін айтып, ол туралы ақпарат сұраған.

Видеодағы әйелдің есімі - Лалагүл Есенова, ол 38 жаста. Түркістан облысының тумасы, қазір Шымкентте балаларымен пәтер жалдап тұрады. 

Лалагүл Есенованың 4 ұлы бар, қазір жұбайымен екіге кеткен. Дегенмен бұрынғы жұбайы балаларымен араласып тұратынын айтады.

Балалардың үлкені 15 жаста, кішісі енді 2 жасқа толады. Лалагүл Есенова "бәрі балаларым үшін" дейді.

Видео кейіпкерінің айтуынша, бұл - оның Арбатта екінші рет өнер көрсетуі.

Лалагүл Есенова көпбалалы ана ретінде балаларға 59 мың теңге көмек алатынын айтты. Дегенмен ол ешкімді мазалағысы келмейтінін де жеткізді.