Қазақстан құрамасы Париж Олимпиадасына аттанды
Париж Олимпиадасына спортшыларымыздың бірінші легі аттанды
Қазақстан ұлттық құрамасын Франция астанасы Парижде өтетін жазғы Олимпиада ойындарына ресми түрде шығарып салу рәсімі өтті. Бұл туралы Dopmedia.kz Туризм және спорт министрлігінің Telegram желісіндегі ресми арнасына сілтеме жасап хабарлайды.
Бұл жиын Алматы облысында орналасқан республикалық олимпиада даярлық кешенінде өтті. Туризм және спорт министрі Ермек Маржықпаев спортшылар мен жаттықтырушылармен тілдесіп, алдағы байрақты бәсекеде сәттілік тіледі.
Айта кетелік, Париж Олимпиадасы 26 шілде мен 11 тамыз аралығында өтеді. Жарысқа 205 елден 10 мыңнан астам спортшы қатысады. Олар 32 спорт түрінен 329 медаль жиынтығын сарапқа салады.
Төрт жылдықтың басты додасында Қазақстан құрамасы сапынан 80 спортшы ел намысын қорғайды. Олар спорттың 25 түрінен бақ сынайды. Қазақстан Тәуелсіздік жылдарынан бері осымен сегізінші мәрте жазғы Олимпиадаға қатыспақ.