Алдағы уақытта Бақыт Сәрсекбаев ұлттық құрама тізгінін ұстай ма?

Фото ашық дереккөзден. Суретте: Бақыт Сәрсекбаев

23 тамыз, 2024

170

Бақыт Сәрсекбаев құраманы баптауға қатысты пікір білдірді

2008 жылы Бейжіңде өткен Олимпиада ойындарының чемпионы Бақыт Сәрсекбаев құрама тізгінін ұстауға байланысты сауалға жауап берді. Бұл туралы Dopmedia.kz тілшісі «Егемен Қазақстан» басылымына сілтеме жасап хабарлайды.

Көптен бері көрінбей кеткен Бақыт Сәрсекбаев қазіргі уақытта Вьетнам елінде қызмет етіп жүргенін айтты.

«Біраз уақыттан бері Вьетнамда еңбек етіп жүрген жайым бар. Нақтылап айтсам, бокстан Ханой қаласы құрама командасының кеңесші-бапкерімін. Бұл жақта да жаман жұмыс істеп жатқан жоқпын. Менің шәкірттерім биылғы Вьетнам чемпионатында 2 алтын, 3 күміс және 3 қола медальды иеленіп, жалпы командалық есепте екінші орынды олжалады. 8,5 миллион тұрғыны бар астаналық боксшылар аталған жарыста бұрын-соңды бірде-бір рет осындай биікке көтерілген емес. Осылай қазіргі кезде Үнді-Қытай түбегінде еңбек етіп жүрмін», – деді Бақыт Сәрсекбаев.

Сонымен қатар Бақыт Сәрсекбаев ұлттық құрамаға бас бапкер болуға қатысты пікірін ортаға салды.

«Оған қарсы емеспін. Бірақ команданы «Еті сенікі, сүйегі біздікі» деген ұстаныммен берсе ғана қабылдаймын. Әркім жұмысыма араласып, «үйт, бүйт» дегенін қаламаймын. Талабым сол. Қазір өзім де жұмыссыз емеспін. Шетелде жемісті еңбек етіп жатқанымды жоғарыда айттым. Вьетнамның спорт басшылары атқарған шаруаларыма дән риза. Ең бастысы, бұл жақта сыйлымын. Алайда қазақ боксының болашағына алаңдаймын. Сол кезде бәрін тастап, елге қайтқым келеді. Қазақ боксын жаңа деңгейге көтерсем деп армандаймын», – деді Бақыт Сәрсекбаев.