Бүгін елордадағы № 34 Барлыбек Сырттанұлы атындағы мектепте жаңа спорт алаңының ресми ашылуы өтті. Қаланың шеткері бөлігінде орналасқан бұл мектепте қазіргі таңда 374 оқушы білім алуда. Білім берудің маңызы зор екені анық, бірақ сонымен бірге балалардың бос уақытын тиімді өткізіп, салауатты өмір салтын ұстануына мүмкіндік беретін спорт алаңының болуы да маңызды. Осы мақсатта Байқоңыр ауданы әкімдігінің қолдауымен жаңа спорт алаңы үш айдың ішінде салынды.

Ашылу салтанатына Астана қаласы Байқоңыр ауданының әкімі Талғат Рахманберді, Білім басқармасының өкілдері, білім беру мекемелерінің басшылары, ата-аналар, ұстаздар, оқушылар және мектептің түлектері қатысты.

«Мектеп оқушыларының білімді де, дені сау болуы біз үшін өте маңызды. Спорт – денсаулықтың негізі, сондықтан білім мен спортты қатар алып жүруіміз қажет», – деді мектеп директоры Мұрат Ахметов.

Ресми ашылудан кейін мектеп оқушылары спорт алаңында өздерінің шеберліктерін көрсетіп, эстафеталық ойындар, асық ату, арқан тарту, кермеге тартылу, футбол және шахмат бойынша сайысқа түсті.