Бақтияр Артаев бокс федерациясын басқаруға лайық па?

Фото ашық дереккөзден. Суретте: Бақтияр Артаев

13 қыркүйек, 2024

спорт

Спорт саласына қатысты петиция құрылды

Қазақстанда спорт саласына реформа жүргізу және олигархтар мен бұрынғы шенеуніктерді спорт басшылығынан аластату талаптарымен петиция құрылды, деп Dopmedia.kz тілшісі Meta-ratings.kz сайтына сілтеме жасап хабарлайды.

Азаматтар спорт саласындағы қазіргі мәселелерге алаңдаушылық білдіріп, жағдайды жақсартуға бағытталған нақты өзгерістерді ұсынады. Петициядағы басты талаптардың қатарында спорттық ұйымдардың басшылығынан олигархтар мен бұрынғы шенеуніктерді шеттету, мемлекет пен спорт федерациялары арасындағы өзара әрекеттестікті қайта қарау және бюджет қаражатын пайдаланудағы ашықтықты арттыру бар.

Петицияда көрсетілген негізгі мәселелер:

1. Халықаралық жарыстардағы қанағаттанарлықсыз нәтижелер.

2. Спорт федерацияларын басқарудағы ашықтықтың жоқтығы.

3. Спортқа бөлінген бюджет қаражатының тиімсіз пайдаланылуы.

Петицияны қолдаушылар осы мәселелерге назар аударылып, Қазақстанның спорт саласында көптен күткен реформалар басталады деп үміттенеді. Петиция авторы – мәжіліс депутаттығына экс-кандидат Дінмұхамед Қаматай.

«Нұрбол Жұмасқалиев Қазақстан футбол федерациясының президенті, ал Бақтияр Артаев бокс федерациясын басқаруы үшін біз бірігіп, петициямызды қолдауымыз қажет. Біз спорттың кез келген түріндегі федерация басшыларын мемлекет кәсіби қасиеттерге негізделген түрде тағайындауын ұсынамыз. Егер бұл жағдай орын алса, Асқар Мамин хоккей федерациясынан, Даниал Ахметов теннис федерациясынан кетеді. Біз басшылыққа кәсіби экс-спортшылар мен жаттықтырушылардың келуін қалаймыз. Бірлесіп, қазақстандық спорттың болашағын өзгерте аламыз», – деді Дінмұхамед Қаматай.

Еске сала кетейік, Қаматай бұған дейін АҚШ-тың Ұлттық студенттік спорт қауымдастығының жүйесін енгізуді ұсынған болатын, бұл көптеген жас спортшылар үшін АҚШ-тағы табысты мансапқа жол ашатын жүйе ретінде қарастырылады.