22-28 қыркүйек аралығында Қарағандыда әйелдер боксынан «Мықтылар турнирі» өтеді, деп хабарлайды Dopmedia.kz.

Бұл жарыс алдағы Азия чемпионатына іріктеу болып саналады. Құраманың бас жаттықтырушысы Елдос Сайдалиннің айтуынша, осы турнирде Азия чемпионатына іріктеу жүргізіледі және боксшылар жаңа ережелер бойынша жұдырықтасады, бұл спортшыларға жаңа ережелерге бейімделуге көмектеседі.

«Бірнеше күннен кейін Қарағандыда «Мықтылар турнирі» басталады. Бұл жарыста біздің қыздарымыз шлемсіз жұдырықтасады. Бұл жаңа ережелер және бізге өзгерістерге бейімделу керек. Турнирде Париж Олимпиадасының жүлдегері Назым Қызайбай қатыспайды», – деді Елдос Сайдалин.

Қазіргі уақытта әр спортшы өз аймақтарында дайындалып жатыр. Кейін қай спортшы қандай салмақ дәрежесіне ауысатыны белгілі болады. Қазіргі уақытта Алуа Балқыбекова ресми түрде 50 кг салмақ дәрежесінде бекітілгенін ғана айтуға болады.

Қарағандыдағы жарыстардан кейін Азия чемпионаты өтеді. Одан кейін ел чемпионаты ұйымдастырылады.