Түркістан облысының Қарамұрт ауылының тұрғыны Лобар Хажиева араққа салынған күйеуінен 30 жыл бойы азап тартып келді. Енді бейбақ әйел өмірін тозаққа айналдырған адамның өлімі үшін 8 жылға түрмеге қамалуға мәжбүр. Бұл туралы Dopmedia.kz ақпараттық агенттігі Время басылымына сілтеме жасап хабарлайды.

Белгілі болған ақпаратқа сүйенсек, ол күйеуінің мойнын өзінің белдігімен қылғындырған. Әйел бұл жағдайды аффект әсерінен болған деп бағалауды сұрайды. Алайда сот бұны ескерген жоқ.

2023 жылдың 11 сәуірінде күйеуі Олжабай Хажиев үйге мас болып оралып, ұйықтап қалады. Оянғаннан кейін, әйелінен ішімдікке ақша сұрайды. Оның әмиянындағы соңғы 1500 теңгесін алып, кетіп қалады. Кешкісін Олжабай аяқтарын әрең басып, үйдің табалдырығында отырып қалады, тіпті ішке кіруге шамасы келмейді. Лобар кешкі ас дайындау үшін ұлынан көршілерден жұмыртқа алып келуді өтінеді және күйеуін үйге кіргізуге әрекеттенеді. Сол кезде күйеуі табалдырықта дәрет сындыруға оқталады. Оның бұл әрекетіне ренжіген Лобарға күйеуі насыбай қосылған жасыл түсті сілекейін бетіне түкіріп, жағады.

Ашуға булыққан Лобар күйеуінің белдігін шешіп, оны мойнына орап, қатты тартады. Араққа тойып алған Олжабай бүйірімен құлап, ауыр тыныстайды. Әйелі мен балалары оның қайтыс болады деп еш ойламаған еді. Олар оны үйге кіргізіп, ұйықтатып қояды, таңертең оянады деп үміттенеді. Алайда таң атысымен оның жансыз денесін көреді.

Сот тергеуі мен процесс кезінде Лобар өткен өміріне шағым жасамайды, өз ауыртпалығын айтып, аяушылық тудыруға тырыспайды. Өзінен басқа ешкімге кінә артпай, сабырлы түрде жағдайды қабылдағандай көрінді.

"Ол әйелдің өмір бойғы міндеті еркегіне “шыдау” деп түсінді. Дегенмен ол бес жыл бұрын полицияға жүгінген. Учаскелік полицейлер отбасылық бұзақыны бірнеше күнге қамаған. Кейін ол үйіне қайтқан соң отбасын қорқыта бастаған. Бұл әйелдің полициядан көмек іздеу туралы барлық ықыласын басып тастады. Екі рет маскүнемдер емханасында емделген, бірақ пайдасы болмады", – деді Лобардың адвокаты Гүлайхан Тұрсұманова.

Олжабай ішімдікке әуестенбей жүргенде шаштараз болып жұмыс істеген, тіпті үйіне қосымша құрылыс та салып алған еді. Алайда уақыт өте келе оның ішпейтін кездері сирей бастады. Сол уақытта Лобар кез келген жұмысты істеуге мәжбүр болды: көршілерінің бақшасын қазып, кафеде ыдыс жуып, мал бақты. Ал күйеуі болса, оның тапқан табысын араққа жұмсап отырған.

"Дегенмен менің қорғауымдағы әйел мұның бәріне шағымданған жоқ. Отбасының басынан не өткергенін куәгерлер, яғни балалары мен көршілері айтып берді. Бес қарамұрттық әйел, біздің студияға және кейін Түркістандағы сотқа қуана куәлік беруге келді. Лобардың өмірі туралы шындықты ашу үшін... Олардың айтуынша, көз жұмған азамат ішетін әрі бұзақылық жасайтын. Әйел балаларымен бірге арықтарда қаншама рет жасырынып жүргенін көрген. Көршілеріне де баруға ұялатын. Содан кейін үйдің шатырында түнеу үшін орын жайғастыратын", – деп түсіндірді Лобардың адвокаты.

Олжабай мен Лобардың төрт баласы болған. Әйел күйеуінің үздіксіз маскүнемдігінен қорғау үшін үлкен қызын ерте күйеуге берген. Кіші ұлы мектеп бітірген соң оқуға кеткен. Ал үлкен ұлы оның сорына айналды. Кішкентай кезінде әкесі мас болып, оны қол арбадан құлатып алғандықтан, ұл мүгедек болып қалған. Енді ол физикалық тұрғыда жұмысқа жарамсыз еді, бұл Олжабайдың ашуына жиі тиетін. Ол ұлын жұмыссыз деп кінәлады, ал Лобар ұлын аяп, күйеуінің шабуылдарынан қорғауға тырысты.

Лобар ажырасу туралы ешқашан ойлаған емес, себебі қайда барарын білмеді, ал көршілердің өсектері мен жаман атақ тұрмысқа шыққан қыздарының өміріне кері әсер етуі мүмкін деп алаңдады. Осылайша, ол шарасыз күйде, басын төмен салып, артық сөз айтпай өмір сүрді. Тергеу барысында да дәл осылай әрекет етті: тергеушілер мен прокурорлардың аяушылығын тудырмай, өзінің қиындықтарын ашып айтпады.

"Ол тіпті түрмеден құтылуға, жазаны жеңілдетуге тырыспады. Маған екеудің өмірін талдап, Лобардың өмірі туралы мәліметтерді шығарып алуға тура келді. Бәлкім, осы себептен жүргізілген психологиялық сараптама аффектіні анықтамады. Ал алғашқы жауаптарында тергеуші оның кісі өлтіруге дайындалғаны туралы жазып алған. Әрине, Лобардың өз азаптаушысының өмірін қию туралы ниеті болмаған. Тек елестетіңіз: ол өзі тамақ ішпесе де, балаларын тойдырып, алкоголь ішетін күйеуіне міндетті түрде толыққанды түскі немесе кешкі ас дайындап беретін. Оның таныстарының айтуынша, ол ұлдарынан әкелері үшін тамақ қалдыруын сұраған. Себебі аш қарынға ішімдік ішкен әлдеқайда қауіпті. Бұл жағдайда қандай ниет туралы айтуға болады?!" – деді адвокат.

Сот қорғаушының психологиялық сараптаманы қайта қарау туралы өтінішін қабылдамады. Егер айыпталушының аффекті дәлелденсе, түрмеге түспеуге мүмкіндік туар еді. Алайда Лобар бұл шешімге сабырмен қарады. Ол алқабилер сотынан бас тартты, бұл оның ауыртпалығын жеңілдетуге мүмкіндік беретінін түсінбеген де шығар.

Соттағы соңғы сөзін күйеуінің туыстарының алдында айтуға тура келді. Ол тек кінәсін мойындап, өкінетінін білдіріп, кешірім сұрады. Күйеуінің туыстары, өз кезегінде, моральдық залал үшін 5 миллион теңге және Қарамұрттан Түркістанға дейінгі жол шығындарын өтеу үшін қосымша 2 миллион теңге талап етті.