Қытай Тайваньды «қоршауға» алды

14 қазан, 2024

181

Қытай Халық-азаттық армиясы Тайвань төңірегінде әскери жаттығулар өткізіп, аралды блокадаға алу және маңызды порттарды бақылау әрекеттерін пысықтады.

Қытай Халық-азаттық армиясы (ҚХАА) Тайвань төңірегінде "Бірлескен қылыш – 2024В" әскери жаттығуларын өткізді. Бұл жаттығулар барысында Қытай әскерлері аралды блокадаға алу, маңызды порттар мен әуе кеңістігін бақылау, және соққы жасау сценарийлерін пысықтады. Қытай тарапы бұл жаттығулар Тайваньның тәуелсіздікке ұмтылыстарына қарсы қатал ескерту екенін және Қытайдың егемендігін қорғау үшін қажетті қадамдар деп мәлімдеді.

Тайвань әкімшілігі бұл маневрлерді "арандатушылық әрекет" деп бағалап, Қытайдың халықаралық су жолдары мен порттарды блокадаға алу әрекеттерін сынға алды. Қытай соңғы жылдары Тайваньға қатысты әскери белсенділігін арттырып келеді, алайда Пекин "бейбіт бірігуді" көздейтінін бірнеше рет атап өтті.

Тайвань мәселесінің тарихи тамыры

1949 жылы Қытайдағы азаматтық соғыс кезінде Қытай мен Тайвань бөлінді. Қытай үкіметі "бір Қытай" қағидасын ұстанып, Тайваньды өзінің ажырамас бөлігі деп санайды. Алайда, Тайвань аралының әкімшілігі "бір ел – екі жүйе" моделін қабылдамай, өзін тәуелсіз мемлекет ретінде көрсетеді. Бұл мәселе бірнеше ондаған жылдар бойы шешілмей, екі тараптың арасындағы қарым-қатынасты шиеленістіріп отыр.