Қазақстан тазы тұқымының иесі – мәртебе берілді

Фото: Ерболат Шадрахов

4 қыркүйек, 2024

161

Халықаралық кинологиялық федерация тазыны мойындап, мәртебе берді.

Халықаралық кинологиялық федерация қазақтың ұлттық қазынасы саналатын тазы итін ресми тұқым ретінде мойындап, оны иттердің ресми тізіміне қосты. Бұл шешім Қазақстан үшін маңызды тарихи оқиға, себебі елімізге тазы тұқымының заңды иесі деген мәртебе берілді. Тазы – қазақ халқының ғасырлар бойы бірге өсіріп, баптаған аңшы ит түрі, оның жылдамдығы мен шыдамдылығы ерекше бағаланады. Федерацияның бұл мойындауы қазақы тазының әлемдік деңгейде танылуына және оның тұқымын сақтап қалуға жаңа мүмкіндіктер ашты. Сонымен қатар, бұл шешім тазының тарихи және мәдени маңыздылығын көрсетеді, әрі Қазақстанның ұлттық мұрасын қорғауға зор үлес қосады.

«Бүгін сіздердің елдеріңіз үшін де, біз үшін де тарихи күн. FCI Стандарттау жөніндегі комиссиясы мен FCI Ғылыми комиссиясы ұзақ рәсімдерден кейін Бас комитетке осы тұқымды тіркеуді ұсынды. Құттықтаймын! Алдағы уақытта сіздерді 10 жылға созылатын жұмыс күтіп тұр. Осы уақыт ішінде иттердің денсаулығына көптеген тестілер жасалып, жаңадан туған тазы күшіктерінің статистикасы жүргізіледі, бұл деректер FCI Ғылыми комиссиясы үшін қажет. Иттердің денсаулығы мен жай-күйі қазіргі таңда өте маңызды мәселелердің бірі. FCI Қазақстандағы тазы тұқымының жүйелі дамуын бақылап отырады», - деді FCI президенті Тамаш Яккель.

Мамыр айында Астанада «Қазақы тазы» ит тұқымын ресми тануға арналған халықаралық көрме өтті. Бұл шара қазақтың ұлттық ит тұқымы – тазының әлемдік деңгейде мойындалуына бағытталған маңызды қадам болды. Көрмені ұйымдастыруға Қазақстан кинологтар одағы үлкен үлес қосты, олар көрмеге қатысу үшін әртүрлі жастағы, санаттағы және түрлі түсті 100 тазы итін мұқият таңдады. Шараға қатысушылар қазақы тазының ерекше қасиеттерін таныстырып, оның ұлттық және тарихи маңыздылығын көрсетіп, келушілерге оның сұлулығы мен аңшылық шеберлігін паш етті.