Қазақстан тағдырын Каканың сары қағазы шешпек

Anvar Ilyasov - FIFA/FIFA via Getty Images. Суретте: футзалдан Қазақстан ұлттық құрамасы

19 қыркүйек, 2024

Ұлттық құраманы алда не күтіп тұр?

Өзбекстанда өтіп жатқан футзалдан әлем чемпионатында Қазақстан құрамасы әлі де топта бірінші орын алуға үлкен мүмкіндіктерге ие. Қазіргі таңда, Қазақстан құрамасы бапкер Пауло Рикардо Кака жетекшілігінде Испания құрамасымен бір қатарда келе жатыр, бірақ испаниялықтар доп айырмашылығы бойынша алда тұр, деп хабарлайды Dopmedia.kz.

Екінші турдың нәтижелері бойынша Қазақстан Ливияны 4:1 есебімен жеңсе, Испания Жаңа Зеландияны 7:1 есебімен ойсырата ұтты. Екі команда да төрт ұпай жинағанымен, Испанияның доп айырмашылығы (+3) оларға көш бастауға мүмкіндік беріп отыр.

Шешуші тур және тактикалық мүмкіндіктер

Соңғы турда Қазақстан құрамасы әлі бірде-бір ұпай жинай алмаған Жаңа Зеландиямен ойнаса, Испания Ливиямен кездеседі. Турнир барысында Ливияның Жаңа Зеландияға қарағанда мықты қарсылас екенін байқадық. Дегенмен, Каканың айтуынша, Қазақстан құрамасы көп гол соғатын команда емес. Бірақ Жаңа Зеландияға қарсы ойында қазақстандықтардың статистиканы жақсартуға мүмкіндіктері бар. Мысалы, 2016 жылғы әлем чемпионатында Қазақстан Соломон аралдарын 10:0 есебімен жеңген болатын.

Гол соғу жеткіліксіз, Каканың сары қағазы кедергі болуы мүмкін

Егер Қазақстан мен Испания бірдей доп айырмашылығына ие болса, не болмақ? Алғашқы критерий – командалардың өзара кездесуі. Бірінші турда Қазақстан мен Испания 1:1 есебімен тең түскен болатын, сондықтан бұл жерде де айырмашылық жоқ.

Келесі критерий – командалардың тәртіп рейтингі, яғни сары және қызыл қағаз санына байланысты есептеледі. Бұл жерде Қазақстан Испаниядан артта келеді. Испанияның екі ойында бір ғана сары қағазы бар, ал Қазақстанда екі қағаз: Кака бапкерге сары, ал Даурен Тұрсағұловқа қызыл қағаз көрсетілген.

Сары қағаз үшін команда -1 ұпай алады, ал тікелей қызыл қағаз үшін -3 ұпай жазылады. Қазіргі сәтте Қазақстанның "-4" ұпайы бар, ал Испанияның "-1" ұпайы ғана бар. Бұл критерий бойынша шешім қабылдану ықтималдығы аз болса да, егер дәл осындай жағдай орын алса, Қазақстанның тек ескерту қағаздары үшін екінші орынға түсуі өкінішті болар еді. Егер Кака осындай сценарийді білгенде, мүмкін Испаниямен ойын барысында эмоциясын ұстап қалатын еді.

Плей-оффтағы қарсыластар қандай болмақ?

Егер Қазақстан топта екінші орынмен қалып қойса, плей-оффта Е тобының жеңімпазына қарсы ойнайды. Бұл топта қазір Португалия мен Марокко көшбасшылыққа таласып жатыр. Яғни, Қазақстан әлем чемпиондарының бірімен немесе турнир фаворитімен кездесуі мүмкін.

Ал егер Қазақстан топтың көшбасшысы болып шықса, онда 1/8 финалда В, Е немесе F топтарындағы үшінші орындағы командалардың біріне қарсы ойнайды. Қазіргі уақытта бұл орындарда Гватемала, Тәжікстан және Хорватия орналасқан.

Қазақстанның Жаңа Зеландиямен ойыны 21 қыркүйекте Ташкентте өтеді. Сол уақытта Испания Ливиямен кездеседі, сондықтан бұл шешуші сәтте барлық назар осы екі ойынға ауатыны сөзсіз.